Ceisiadau

Rydym yn ceisio arddangos amrywiaeth eang o waith o’r cysyniadol i waith crefft a dylunio, ac rydym yn gweithio gydag artistiaid o bob cwr o’r byd. Rydym yn arddangos gweithiau ar bob math o themâu, ond mae gennym ddiddordeb arbennig mewn gwaith sy’n ymateb yn benodol i’r lleoliad a’i hanes, ac i syniadau Clough ac Amabel Williams-Ellis a’u plant. Gallai hyn gynnwys syniadau yn ymwneud a chelf, dylunio, pensaernïaeth, cymdeithas, gwleidyddiaeth, cynllunio, gwyddoniaeth, llenyddiaeth, cadwraeth, neu unrhyw fater arall a archwilwyd ganddynt yn eu gyrfaoedd hir ac amrywiol.

Y syniad yw i annog yr artistiaid rydym yn gweithio â nhw i ymgymryd â’r gwaith a wnaethpwyd gan deulu Brondanw, a’i herio neu ei ddatblygu ymhellach, ei ddiweddaru neu ei wrthod yn gyfangwbl, ond i ystyried treftadaeth y lle yn y foment bresennol ac ystyried a yw’n berthnasol i’r dyfodol? Rydym yn chwilio am ymatebion gonest, treiddgar a gwreiddiol, nid i fawrygu yn ddigwestiwn.

Gweler y tudalennau ‘Hanes a Chasgliadau’ i ddysgu mwy am y teulu Williams-Ellis a’u gwaith. Mae croeso i chi holi ymhellach am unrhyw rhan o hyn sydd o ddiddordeb i chi, mi wnaiff ein curadur casgliadau ei gorau i’ch rhoi chi ar ben ffordd.

Wedi dweud hyn oll, rydym hefyd yn agored i syniadau artistiaid sydd a wnelo nhw ddim a hanes y safle, ond fod y gwaith yn wrediddiol ac yn ystyrlon.

Y peth arall yr ydym yn awyddus i artistiaid ei ystyried yw a allent gynnig gweithdai, sgyrsiau neu ddigwyddiadau eraill fel rhan o’u hamser ym Mrondanw. Rydyn ni'n rhoi llawer o bwyslais ar ymgysylltu â'r gymuned ac rydyn ni eisiau cynnig cyfleoedd i bobl o bob oed a gallu i brofi'r broses greadigol drostynt eu hunain. Gweler ein tudalennau ‘digwyddiadau’ am ragor o wybodaeth am hyn.