Arddangosfeydd

Eleanor Brooks: Bywyd mewn Portreadau

28 Mehefin – 10 Awst 2025
Fel dilyniant i arddangosfa 2018 o’i thirweddau, ac i ddathlu pen-blwydd ei genedigaeth ym 1925, mae’r arddangosfa hon yn canolbwyntio ar y portreadau a wnaeth Eleanor Brooks yn ystod ei gyrfa a, thrwyddynt, yn adrodd hanes ei bywyd rhyfeddol fel artist a mam. Mae’r detholiad yn cynnwys portreadau cynnar a beintiwyd pan oedd Eleanor yn yr ysgol gelf ar ddiwedd y 1940au, portreadau agos-atoch o’i theulu ei hun a’r merched au pair a fu’n byw gyda nhw, a phaentiadau o’r llu o ferched ysgol a ddysgodd yn Llundain cyn symud i fyw i Gymru yn barhaol yn 1990. Byddai’r arddangosfa’n anghyflawn heb bortreadau o Mrs Spinks, y ddynas glanhau a gnociodd ar ddrws Eleanor yn 1967. Dros gyfnod o saith mlynedd, gwnaeth Eleanor bortreadau o’r wraig hynnod hon trwy bron pob cyfrwng y gellir ei ddychmygu, yn ddau a thri dimensiwn. Yn y rhain, ac yn ei holl waith, yr hyn sy’n disgleirio mor syfrdanol yw cariad Eleanor at bobl a’i rhyfeddod at y byd yn gyffredinol.

Ensemble – Menna Angharad a Jeremy Stiff

16 Awst – 28 Medi 2025
Mae Jeremy a Menna wedi galw’r arddangosfa yn Ensemble i dathlu 25 mlynnedd efo’u gilydd – 25 mlynedd o fyw efo’u gilydd, o weithio ochr yn ochr fel artistiaid ac o arddangos yn aml efo’u gilydd. Mewn ystyr ehangach maent yn teimlo bod myfyrio ar Ensemble yn rhywbeth positif a chadarnhaol, rydym yn y byd hwn efo’n gilydd, artist a thestyn, gwaith celf a’r gwyliwr, oriel a chymuned, cenedl a byd, yr amgylchedd a ni…..Mae’n wrthgyferbyniad i ideoleg ymrannol.

Mae Jeremy yn gweithio mewn carreg, pren ac efydd. Mae'n distyllu ei destunau i siapiau syml, llawn mynegiant, gan ganolbwyntio ar eu hanfodion yn hytrach na'u ffurf llythrennol, ac ar rinweddau ffisegol cynhenid y defnyddiau: llyfnder marmor, tryleuedd alabaster, graen pren. Mae corfforoldeb y defnyddiau eu hunain a'r broses o’u gweithio yr un mor bwysig iddo â'r pwnc. Bydd Jeremy hefyd yn arddangos ei bortreadau o Susan Williams-Ellis y dechreuodd yn ystod ei gyfnod preswyl ym Mhlas Brondanw yn 2023.

Mae paentiadau Menna yn archwilio golygfeydd a gwrthrychau bob dydd, gan ganolbwyntio’n aml ar natur - cwlwm o blanhigion gwyllt, pennau hadau, ffrwythau, blodau, neu eitemau cartref cyfarwydd. Nid yw ei gwaith yn ymwneud â chynrychiolaeth llythrennol ond mae’n archwilio ei empathi â manylion distadl ein bywydau. Mae'n dathlu ei phynciau wrth ymhyfrydu yn lliwiau a gwead paent olew ar liain.

Matthew Wood
‘Dal yr Weledigaeth’ cyfres fach Plas Brondanw

16 Awst – 28 Medi 2025
Mae wedi bod yn bleser pur cael fy ngwahodd i ymateb i Blas Brondanw. Ar fy ymweliad cyntaf, cefais fy swyno'n llwyr gan ei leoliad a'r awyrgylch y mae'n ei gyfleu. Yr hyn sydd fwyaf trawiadol yw'r ffordd mae’r golau yn adlewyrchu o fewn y tŷ a'r ffordd y mae'n goleuo'r golygfeydd niferus trwy ffenestri a drysau sy'n arwain i'r gerddi a thu hwnt i hynny mynyddoedd Eryri. Wedi'i fframio bob amser gan adlewyrchiad golau ar loriau derw a llechi a chyda'r golau ar waliau a nenfydau, canfûm fod Plas Brondanw yn lleoliad gwirioneddol anhepgorol sy'n adlewyrchu meddylgarwch a sylw i fanylion Clough a Susan Williams Ellis a'u gweledigaeth.

Siân Hutchinson
Hela’r golau

16 Awst – 28 Medi 2025
Mae Siân yn artist sy’n arbenigo mewn archwilio papur, a dreuliodd fis Medi a Hydref 2024 yn Oriel Brondanw yn cael ei hysbrydoli gan siâp, ffurf a golau. Wrth ddilyn ei chwilfrydedd, gweithiodd Siân yn ddigymell, gan ganiatáu i reddf lywio ei phroses. Gan aros a hela’r golau gyda’i chamera, defnyddiodd Siân bapur i archwilio technegau a syniadau.

Mae’r arddangosfa hon yn dangos gweithiau ‘ar y gweill’; archwiliad gan ddefnyddio papur mewn 2 a 3 dimensiwn, ffotograffau a delweddau symudol.

Mae Siân yn ein gwahodd i oedi, arafu a bod yn chwilfrydig.

Ers sawl blwyddyn mae Siân wedi bod yn archwilio thema ‘Oedi, Gofod a’r Bylchau Rhwng pethau’ i ddatblygu a hwyluso prosiectau llesiant sydd â’r nod o leihau Straen.

Gwefan

Pan Oedd Geifr yn Bluog
gyda Ali Pickard

4ydd Hydref – 9fed Tachwedd 2025
Mae Ali Pickard yn cyfuno hanes ag oriau di-rif o grefftwaith i greu cerfluniau celfyddyd gain sy’n adlewyrchu byd sydd yn gyfarwydd ac yn anghyfarwydd ar yr un pryd. Mae ei gwaith yn datgelu straeon coll a hanesion cudd, gan archwilio themâu yn cynnwys profiadau menywod, esblygiad iaith, a'r berthynas cymhleth rhwng colli ac ennill. O fewn ei darnau aflonyddgar ond myfyriol, mae Medelwyr, Casglwyr Geiriau, a Hanner-Greaduriaid sydd wedi'u dal rhwng gwahanol fathau o realiti yn dod yn fyw.

Ar ôl bod yn rhan o gydweithfa weldio celfyddydol i fenywod, ac ar ôl blynyddoedd lawer o beidio â chreu, dychwelodd i'w hymarfer creadigol yn 2022 ac mae bellach yn artist tecstilau hunanddysgedig arobryn. Trwy ei chelf, mae hi'n ymgymryd â phrosesau araf, yn adeiladu fesul haen a brodweithio gyda llaw, gan gynnig gwrthbwynt i'n bywydau cyflym a'i meddwl prysur ei hun. Mae hyn yn arbennig o berthnasol mewn oes lle mae deallusrwydd artiffisial cyflym yn ymyrryd fwyfwy ar uniondeb artistig. Nid yn unig y mae ei gwaith yn anrhydeddu sgiliau crefftio traddodiadol ond mae'n eu plethu â chysyniadau ystyrlon, gan ddefnyddio safbwyntiau hanesyddol yn aml i fyfyrio ar gymdeithas gyfoes.

Mae hi'n creu o dan yr enw The Yaffingale, sy'n hen air am y Gnocell Werdd.

Enillodd Ali Pickard wobr Artist sy’n Dod i’r Amlwg Plas Brondanw yn 2024

Vanessa Burroughes
Gwaith wedi ei ysbrydoli gan Susan Williams-Ellis a gerddi Plas Brondanw

4 Hydref – 9 Tachwedd 2025
Mae Vanessa Burroughes wedi cael ei denu at gasgliadau erioed, ei chasgliadau ei hun a chasgliadau pobl eraill. Mae ei gwaith mewn ymateb i Plas Brondanw a dyluniadau Susan Williams-Ellis wedi mynd â hi ar daith drwy ddyfrlliwiau, papurau a grëwyd o astudiaethau lliw, a blociau leino bach ac argraffu leino ar raddfa fawr.

John Hedley a Sian Hughes
Esblygu drwy Natur

4 Hydref – 16 Tachwedd 2025
Mae John Hedley a Sian Hughes yn cydweithio ar brosiect newydd sy'n esblygu, gan ymateb yn unigol i bren o ystâd Brondanw.

Byddant yn creu gosodiadau awyr agored trwy ymyriadau creadigol gyda'r pren, gan ddefnyddio amrywiaeth o ddefnyddiau gan gynnwys metel, gwifren a phorslen. Drwy wneud hynny byddant yn ymateb i dir a thirwedd Plas Brondanw ac yn eu dathlu.

Bydd y gwaith yn cael ei arddangos yn y cwrt, lle mae coeden yn dod yn rhan o'r gosodiad.

Mae hyn yn rhan o brosiect a gefnogir gan Gyngor Celfyddydau Cymru.